好幾日前，當我講到當年在街頭被「差人」打，和被帶到差館門口，有前輩就講起一個人名，汪志強，相信講得出呢個名的朋友，年紀最少六十過外，更可能會是曾經江湖打滾，簡單而言，唔係飛仔就係飛女。因為汪志強是當年非常出名的反飛探長，每次Night Bird , Purples Onion ,一查牌，汪Sir 就會到場。

以上兩個場是當年較為便宜和多人到的「的士夠格」Disco，因為入場費不貴，又多後生仔女，因此，是較為受一般的屋邨仔女，或者工廠仔和工廠妹到的地方。而有沒有富有人家，是相當少有，曾經認識過一個，老豆係九龍城開雜貨鋪，在我們眼中已經是好一點的生活。其他都是日頭返工，夜晚返學的人。

當年，差人會藉著查牌，搵通緝犯，失縱的少男少女，講笑咁講，也有機會看清楚目標。無事打三鎚，當年是等閒之事，不過，汪探長就喜歡殺兩板（打兩巴），尤其是駁嘴，一定打，相信當天無邊個飛仔和飛女被佢打過。不過汪探長如果還在人世，相信都覺得自己還是手鬆，原來今天佢的徒孫，徒蚤打人狠過佢好多。