好快我就六十五歲，我算是見證過香港警察的變化，從幼年時期的警黑合作，通街字花，外圍，賭檔更甚的是白粉檔，但對於一般人是沒有影響。

記得我考差人的時候，要阿媽簽名，但忘記左阿媽係做過賣菜，更講左句，咁多嘢唔做，走去做差人，因為她沒法忘記，無派片就被一腳踼走攞菜，但若果你無做這些，警察就不會搞你，但你就一定唔好惹佢，班雜差真係夠膽拿枝槍話辣低你。

當年重有一種叫做駁腳，應該惡過普通差人，大家有睇四大探長的電影，戲裡面那個「仔哥」，就係呢種角色，大家可能懷疑他們會不會有槍，我大膽話你聽，有部份駁腳係有槍。佢地負責收片，更負責分錢比老散，其中部份更是負責白粉檔的秩序，說來複雜，希望有機會詳細講下。

到了1973年，有了老廉之後，好多差人覺得，老廉就等於第二個「棺材釘」，即是警察部的反貪污部門，確實，這個「棺材釘」，都會視乎情況去查，主要他們都有份分錢。到後來察覺到，老廉唔係同你開玩笑，所以，好多都要走路，後來特赦左一班人，警察部就起來了，真正令人尊敬的皇家警察，有規有矩，砌生豬肉都講道義，人就無拉錯，不過叉池就落錯，大家明白意思嗎？意思就是，拉一個頂十條罪，提高破案率，部份人有利益是心甘情願，尤其是老同。

也令我想到今天很多年輕差人的行為，事實上，自己年紀大左就想到，一個如此年輕的人，有槍，有權力，更可能被容縱，自以為有乜事就有上大人照保，這個希望我估錯，但自己年輕過，也是紀律部隊中人，看到一些醒目仔受靶，也是答案之一。